ಆಯ್ತಾರಾಚೆಂ ಕ್ರಿಸ್ತಿ ಶಿಕ್ಷಣ್ 2026-27 ವ್ಯಾ ವರ್ಸಾಚೆಂ ಉಗ್ತಾವಣ್ ವಾಮಂಜೂರ್ ಸಾಂತ್ ಜುಜೆ ಕಾಮೆಲಿ ಫಿರ್ಗಜೆಂತ್ ಸಕಾಳಿಂಚ್ಯಾ 7:30 ವೊರಾಂಚ್ಯಾ ಮಿಸಾವೆಳಾರ್ ಭಕ್ತಿಪಣಾನ್ ಚಲೊನ್ ವ್ಹೆಲೆಂ. ಭುರ್ಗ್ಯಾಂಕ್ ಭಾವಾರ್ಥಾಂತ್ ಆನಿ ಕ್ರಿಸ್ತಾಂವ್ ಮೌಲ್ಯಾಂನಿ ವಾಡೊಂವ್ಚಿ ಗರ್ಜ್ ದಾಕವ್ನ್ ದೀವ್ನ್, “ಭುರ್ಗ್ಯಾಂಕ್ ಮ್ಹಜೆಸರ್ಶಿಂ ಯೇಂವ್ಕ್ ಸೊಡಾ” (ಮಾತೆವ್ 19:13-15) ಮ್ಹಳ್ಳ್ಯಾ ಧ್ಯೇಯಾ ಸವೆಂ ಹೆಂ ಆಚರಣ್ ಮಾಂಡುನ್ ಹಾಡ್‌ಲ್ಲೆಂ.

ಉಗ್ತಾವಣಾಚಿ ರೀತ್ ಭುರ್ಗಿಂ, ವ್ಹಡಿಲಾಂ (ಆವಯ್-ಬಾಪಯ್), ದೊತೊರ್ನಿಚಿಂ ಶಿಕ್ಷಕಾಂ, ಫಿರ್ಗಜ್ ಗೊವ್ಳಿಕ್ ಪರಿಶದ್ ಮುಖೆಲಿ ಆನಿ ಜೆಜುಚೆಂ ರೂಪ್ ನೆಸ್ ಲ್ಲ್ಯಾ ಎಕಾ ಭುರ್ಗ್ಯಾಚ್ಯಾ ಅರ್ಥಾಭರಿತ್ ಪ್ರವೇಶ್‌-ಪುರ್ಶಾಂವಾ ಸವೆಂ ಆರಂಭ್ ಜಾಲಿ. ಹ್ಯೆ ರೀತಿನ್ ಭುರ್ಗ್ಯಾಂಚ್ಯಾ ಭಾವಾರ್ಥಾಚೆ ವಾಡಾವಾಳಿಂತ್ ಕುಟ್ಮಾಚಿ, ಶಿಕ್ಷಕಾಂಚಿ ಆನಿ ಫಿರ್ಗಜ್‌ಗಾರಾಂಚಿ ಜವಾಬ್ದಾರಿ ದಾಕವ್ನ್ ದಿಲೆಂ.

ಮಾನಾಧಿಕ್ ಬಾಪ್ ಲೊರೆನ್ಸ್ ಮಸ್ಕರೇನ್ಹಸ್, ಫಿರ್ಗಜ್ ವಿಗಾರ್ ಹಾಣಿಂ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ, ಆನಿ ಮಾನಾಧಿಕ್ ಬಾಪ್ ಜೀವನ್ ಲೋಬೊ ಹಾಣಿಂ ಸಹಭೆಟವ್ಣಿ ಕರ್‍ನ್ ಸಾಂಗಾತ್ ದಿಲೊ. ದೇವ್-ಸ್ತುತೆ ವೆಳಾರ್, ವ್ಹಡಿಲಾಂನಿ, ದೊತೊರ್ನಿಚ್ಯಾ ಶಿಕ್ಷಕಾಂನಿ ಆನಿ ಭುರ್ಗ್ಯಾಂನಿ, ಭಾವಾರ್ಥಾಚೆಂ ಜಿವಿತ್ ವಾಡೊಂವ್ಚ್ಯಾಂತ್ ಎಕಾಮೆಕಾ ಸಾಂಗಾತಾ ಮೆಳೊನ್ ವಾವ್ರ್ ಕರ್ಚಿ ಭಾಸಾವ್ಣಿ ನವ್ಯಾನ್ ಕೆಲಿ. ಮಿಸಾಚ್ಯಾ ಅಖ್ರೇಕ್ ಚಲೊವ್ನ್ ವ್ಹೆಲ್ಲ್ಯಾ ಆರಾಧನಾ ವೆಳಾರ್, ಭುರ್ಗಿಂ, ತಾಂಚಿಂ ಕುಟ್ಮಾಂ ಆನಿ ದೊತೊರ್ನಿಚ್ಯಾ ಶಿಕ್ಷಕಾಂಚೆರ್ ದೆವಾಚೆ ಆಶೀರ್ವಾದ್ ಮಾಗೊನ್, ವಿಶೇಸ್ ಮಾಗ್ಣೆಂ ಭೆಟಯ್ಲೆಂ.

ಭುರ್ಗಿಂ, ವ್ಹಡಿಲಾಂ, ದೊತೊರ್ನಿಚೆ ಶಿಕ್ಷಕ್ ಆನಿ ಫಿರ್ಗಜ್‌ಗಾರಾಂಚ್ಯಾ ಉರ್ಬೆವಂತ್ ಪಾತ್ರ್ ಘೆವ್ಪಾ ಸವೆಂ ಹೆಂ ಉಗ್ತಾವಣ್ ಸಂತೊಸಾನ್ ಅಖೇರ್ ಜಾಲೆಂ. ಹ್ಯಾ ಸವೆಂ, ಭಾವಾರ್ಥಿ ಶಿಕ್ಪಾಚ್ಯಾ ನವ್ಯಾ ವರ್ಸಾಕ್ ಅರ್ಥಾಭರಿತ್ ಸುರ್ವಾತ್ ಮೆಳ್ಳಿ.