ಕಾಮೆಲಿ ಸಾಂ ಜುಜೆ ಫಿರ್ಗಜ್, ಸಾಂ ಕ್ಲೇರ್ ಸ್ತ್ರೀ ಸಂಘಟನಾನ್ ಸ್ತ್ರೀಯಾಂಚೊ ದೀಸ್ 2026 ಮಾರ್ಚ್ 8 ತಾರಿಕೆರ್ ವ್ಹಡಾ ಸಂಭ್ರಮಾನ್ ಆಚರ್ಸಿಲೊ.
ಸಕಾಳಿಂ 7:3೦ ವರಾಂಚೆಂ ಅರ್ಗಾಂ ಮೀಸ್ ವಿಗಾರ್ ಭೋ| ಮಾ| ಬಾ| ಜೇಮ್ಸ್ ಡಿಸೋಜಾ ಹಾಣಿಂ ಭೆಟಯ್ಲೆಂ. ಸರ್ವ್ ಸಾಂದೆ ಫಿರ್ಗಜ್ಗಾರಾಂ ಸಂಗಿಂ ಮೆಳೊನ್ ಧನ್ಯಾ ದೆವಾಕ್ ಅರ್ಗಾಂ ದೀವ್ನ್ ಪಾತ್ರೊನ್ ಸಾಂ ಕ್ಲೇರಾಚಿ ಮಜತ್ ಮಾಗ್ಲಿ.
ತ್ಯಾ ದೀಸ್ ಸಾಂಜೆರ್ 5:3೦ ವರಾರ್ ಸ್ತ್ರೀಯಾಂಚೊ ದೀಸ್ ಆಚರಣ್ ಫಿರ್ಗಜ್ ವಿಗಾರ್ ತಶೆಂ ಸಿಟಿ ವಾರಾಡೊ ವಿಗಾರ್ವಾರ್ ಭೋ| ಮಾ| ಬಾ| ಜೇಮ್ಸ್ ಡಿಸೋಜಾ ಹಾಂಚ್ಯಾ ಅಧ್ಯಕ್ಷ್ಪಣಾರ್ ಚಲವ್ನ್ ವ್ಹೆಲೆಂ. ಮುಖೆಲ್ ಸಯ್ರೆ ಮಾ| ಬಾಪ್ ಜೀವನ್ ಶೈಲೇಶ್ ಲೋಬೋ ಸಹಾಯಕ್ ವಿಗಾರ್, ಸಂಪನ್ಮೂಲ್ ವ್ಯಕ್ತಿ ಪ್ರೊ| ಹಿಲ್ಡಾ ರಾಯಪ್ಪನ್, ಮಾ| ಭ| ಲೀನಾ ವಿ.ಜೆ. SRA ಪ್ರೊವಿನ್ಶಿಯಲ್, ಮಾ| ಭ| ಲಿಲ್ಲಿ ಪಿರೇರಾ ಬೆಥನಿ ಪ್ರೊವಿನ್ಶಿಯಲ್, ಮಾನೆಸ್ತಿಣ್ ಕ್ಲಾರಾ ಪಿಂಟೊ ಅಧ್ಯಕ್ಷ್ ಸ್ತ್ರಿ ಸಂಘಟನ್ ಸಿಟಿ ವಾರಾಡೊ, ಮಾನಾಚೆ ಸಯ್ರೆ ಜಾವ್ನ್ ಮಾನೆಸ್ತ್ ಅನಿಲ್ ಗ್ರೇಶಿಯನ್ ಪಿಂಟೊ, ಉಪಾಧ್ಯಕ್ಷ್ ಫಿರ್ಗಜ್ ಗೊವ್ಳಿಕ್ ಪರಿಷದ್, ಮಾನೆಸ್ತಿಣ್ ಲವಿನಾ ಡಿಸೋಜಾ ಕಾರ್ಯದರ್ಶಿ ಫಿರ್ಗಜ್ ಗೊವ್ಳಿಕ್ ಪರಿಷದ್, ಮಾನೆಸ್ತ್ ಸಿಪ್ರಿಯನ್ ಲೋಬೊ ಸರ್ವ್ ಆಯೋಗಾಂಚೊ ಸಂಯೋಜಕ್, ಭ| ವೀರಾ ಮೊನಿಸ್ SRA, ಮಾರ್ಗದರ್ಶಕಿ ಸ್ತ್ರೀ ಸಂಘಟನ್, ಮಾನೆಸ್ತಿಣ್ ಗ್ರೆಟ್ಟಾ ಮಿನೇಜಸ್ ಅಧ್ಯಕ್ಷ್ ಸ್ತ್ರೀ ಸಂಘಟನ್ ಆನಿ ಮಾನೆಸ್ತಿಣ್ ರೋಜ್ಲಿನ್ ಮೇರಿ ಡಿಸೋಜ ಕಾರ್ಯದರ್ಶಿ ಸ್ತ್ರೀ ಸಂಘಟನ್ ವೆದಿಚೆರ್ ಹಾಜರ್ ಆಸ್ಲ್ಲಿಂ.
ಸುರ್ವೆರ್ ಭುರ್ಗ್ಯಾಂನಿ ಪ್ರಾರ್ಥನ್ ನೃತ್ಯಾ ದ್ವಾರಿಂ ದೆವಾಚಿ ಕುರ್ಪಾ ಕಾರ್ಯಾಚೆರ್ ಮಾಗ್ಲಿ. ಅಧ್ಯಕ್ಷ್ ಮಾನೆಸ್ತಿಣ್ ಗ್ರೆಟ್ಟಾ ಮಿನೇಜಸಾನ್ ವೆದಿ ವಯ್ರ್ ಆನಿ ವೆದಿ ಮುಕಾರ್ ಹಾಜರ್ ಆಸ್ಲ್ಲ್ಯಾ ಸಮೆಸ್ತಾಂಕ್ ಸ್ವಾಗತ್ ಕೆಲೊ. ಕಾರ್ಯದರ್ಶಿನ್ 2025-26 ವ್ಯಾ ಆವ್ದೆಚಿ ಸ್ತ್ರೀ ಸಂಘಟನಾಚಿ ವರ್ದಿ ವಾಚ್ಲಿ.
ಮಾ| ಭ| ಲಿಲ್ಲಿ ಪಿರೇರಾನ್ ಸ್ತ್ರೀಯಾಂನಿ ಕುಟ್ಮಾಂತ್, ಫಿರ್ಗಜೆಂತ್ ತಶೆಂ ಸಮಾಜೆಂತ್ ತಾಂಚೊ ವಾವ್ರ್ ಬರ್ಯಾ ಥರಾನ್ ಚಲವ್ನ್ ವ್ಹರುಂಕ್ ಉಲೊ ದಿಲೊ. ಪ್ರೊ| ಹಿಲ್ಡಾ ರಾಯಪ್ಪನ್ ಪಂಚ್ವೀಸ್ ವರ್ಸಾಂ ಪಯ್ಲೆ ವಾಮಂಜೂರ್ ಫಿರ್ಗಜೆಚಾ ವಿಗಾರ್ ದೆ| ಮೊನ್ಸಿಜ್ಞೊರ್ ಅಲೆಕ್ಸಾಂಡರ್ ಡಿಸೋಜಾ ಸಾಂಗಾತಾ ಸ್ತ್ರೀಯಾಂಚಾ ಉದರ್ಗತೆ ಪಾಸತ್ ಯೋಜನಾ ಘಾಲ್ಲೆ ವಿಷಯ್ ಉಗ್ಡಾಸಾಕ್ ಹಾಡ್ನ್ ಪ್ರಸ್ತುತ್ ಸ್ತ್ರೀ ಸಂಘಟನಾಚಾ ವಾವ್ರಾ ವಿಶಿಂ ತಿಚೊ ಸಂತೊಸ್ ವ್ಯಕ್ತ್ ಕರ್ನ್ ಯುವ ಸ್ತ್ರೀಯಾಂಚಾ ಸಮಸ್ಯಾ ವಿಶಿಂ ಉಲೊವ್ನ್ ಆಧುನಿಕ್ ಸಮಾಜೆಂತ್ಲ್ಯಾ ಚಟುವಟಿಕೆ ವಿಶಿಂ ಜಾಗೃತಿ ದಿಲಿ.
2022-25 ವ್ಯಾ ಆವ್ದೆಂತ್ ಸ್ತ್ರೀ ಸಂಘಟನಾಚಿ ಅಧ್ಯಕ್ಷ್ ಜಾವ್ನ್ ಉತ್ತೀಮ್ ಸೆವಾ ದಿಲ್ಲ್ಯಾ ಮಾನೆಸ್ತಿಣ್ ಅಸುಂಪ್ತಾ ಪಾಯ್ಸ್ ಹಾಂಕಾ ಆನಿ ಸೇನಾದಳಾಂತ್ ವಿಶೇಸ್ ಸಾಧನ್ ಕೆಲ್ಲ್ಯಾ ಕುಮಾರಿ ಸೋನಲ್ ಕ್ರಾಸ್ತಾ ಹಾಂಕಾ ಕಾರ್ಯಾಚಾ ಅಧ್ಯಕ್ಷಾನ್ ಗೌರವಾನ್ವಿತ್ ಸಯ್ರ್ಯಾಂ ಸಂಗಿಂ ಮೆಳೊನ್ ಶಾಲ್ ಪಾಂಗ್ರುನ್ ಯಾದಿಸ್ತಿಕಾ ದೀವ್ನ್ ಸನ್ಮಾನ್ ಕೆಲೊ.
ಕಾರ್ಯಾಚೊ ಅಧ್ಯಕ್ಷ್ ಭೋ| ಮಾ| ಬಾ| ಜೇಮ್ಸ್ ಡಿಸೋಜಾನ್ ಸ್ತ್ರೀ ಮ್ಹಳ್ಯಾರ್ ಸೆವೆಚೊ ಘುರ್ತ್. ಆಮ್ಚಾ ಫಿರ್ಗಜೆಂತ್ ಶಾತಿವಂತ್ ಸ್ತ್ರೀಯೊ ಆಸಾತ್. ಸರ್ವಾಂನಿ ಸಾಂಗಾತಾ ಮೆಳೊನ್ ಎಕ್ವಟಿತ್ ವಾವ್ರ್ ಕೆಲ್ಯಾರ್ ಫಿರ್ಗಜ್ ಉದರ್ಗತೆಕ್ ಪಾವ್ತಲಿ ಮ್ಹಳ್ಳ್ಯಾ ಉತ್ರಾಂನಿ ಸ್ತ್ರೀಯಾಂಕ್ ಪ್ರೋತ್ಸಾಹ್ ದಿಲೊ.
ವೆದಿರ್ ಹಾಜರ್ ಆಸ್ಲ್ಲ್ಯಾ ಸಮೆಸ್ತಾಂಕ್ ಕಾರ್ಯಾಚಾ ಅಧ್ಯಕ್ಷಾನ್ ಉಗ್ಡಾಸಾಚಿ ಕಾಣೆಕ್ ದಿಲಿ. ಘಟಕಾಚ್ಯಾ ಅಧ್ಯಕ್ಷಾನ್ ಹ್ಯಾ ಕಾರ್ಯಾಕ್ ಆರ್ಥಿಕ್ ತಶೆಂ ವರ್ವಿಂ ದೀವ್ನ್ ಸಹಕರ್ಸಿಲ್ಲ್ಯಾಂಕ್, ಸರ್ವ್ ದಾನಿಂಕ್ ಆನಿ ಹಿತಚಿಂತಕಾಂಕ್ ಫುಲ್ ದೀವ್ನ್ ಅಭಿನಂದನ್ ಪಾಟವ್ನ್ ತಾಂಚೊ ಉಪ್ಕಾರ್ ಭಾವುಡ್ಲೊ. ಸಹಕಾರ್ಯದರ್ಶಿ ಮಾನೆಸ್ತಿಣ್ ಉಷಾ ಎಮಿಲ್ಡಾ ಡಿಸೋಜಾನ್ ಸರ್ವಾಂಕ್ ಧನ್ಯವಾದ್ ಪಾಟಯ್ಲೆಂ.
ಸಾಂಸ್ಕೃತಿಕ್ ಕಾರ್ಯಕ್ರಮ್ ಜಾವ್ನ್ ಸಂಘಟನಾಚಾ ಸಾಂದ್ಯಾಂ ಥಾವ್ನ್ ಏಕ್ ಪಂಗಡ್ ನೃತ್ಯ್ ಆನಿ ಪಂಗಡ್ ಗಾಯನ್ ಆಸಾ ಕೆಲ್ಲೆಂ. ಸಂಘಟನಾಚಾ ಸರ್ವ್ ಸ್ತ್ರೀಯಾಂನಿ ಧ್ಯೇಯ್ ಗೀತ್ ಗಾವ್ನ್ ತ್ಯಾ ದಿಸಾಚೊ ಸಂತೊಸ್ ವ್ಯಕ್ತ್ ಕೆಲೊ.
ಮಾ| ಬಾ| ಆಲ್ವಿನ್ ಸೆರಾವೊ ಹಾಣೆ ಬರಯಿಲ್ಲೊ, ಸ್ತ್ರೀಯಾಂಚಾ ಭೊಗ್ಣಾಂನಿ ವಿಣ್ಲಲ್ಲೊ ನಾಟಕ್ ಮರಿ ಮಗ್ದಲಿನ್, ಮಾನೆಸ್ತ್ ಕ್ರಿಸ್ಟೋಫರ್ ನೀನಾಸಂ ಹಾಂಚ್ಯಾ ನಿರ್ದೇಶನಾ ಖಾಲ್, ಅಸ್ಥಿತ್ವ (ರಿ) ಪಗ್ಡಾಂ ಥಾವ್ನ್ ಪ್ರದರ್ಶಿತ್ ಜಾಲೊ. ಹೊ ನಾಟಕ್ ಸ್ತ್ರೀಯಾಂಚಾ ದಿಸಾಕ್ ಜೊಕ್ತೊ ತಶೆಂ ಕರೆಜ್ಮಾಚಾ ಕಾಳಾಕ್ ವಾಂಜೆಲಾ ಥಾವ್ನ್ ವಿಂಚ್ಲಲೊ ಜಾಲ್ಲ್ಯಾನ್ ಸಬಾರಾಂ ಥಾವ್ನ್ ಹೊಗ್ಳಿಕೆಕ್ ಪಾತ್ರ್ ಜಾಲೊ.
ಸ್ತ್ರೀಯಾಂಚಾ ದಿಸಾಚಾ ಖರ್ಚಾಕ್ ತಶೆಂಚ್ ಹಾಜರ್ ಜಾತೆಲ್ಯಾಂಚಾ ಖಾಣ್ ಪೀವನಾಚಾ ಗರ್ಜೆಕ್ ಫುಡ್ ಸ್ಟಾಲ್ ಆಸಾ ಕೆಲ್ಲೆಂ. ಸ್ತ್ರೀಯಾಂಚಾ ದಿಸಾಕ್ ಮಾನೆಸ್ತಿಣ್ ಸೊನಿಯಾ ಮೊಂತೆರೊ ಹಾಣೆ ನಿರೂಪಕ್ ಜಾವ್ನ್ ಕಾರ್ಯೆಂ ಚಲವ್ನ್ ವ್ಹೆಲೆಂ
